Ar 6 Aibrean 2011, sheol Comhairle Contae Dhún na nGall, Institiúid Teicneolaíochta Leitir Ceanainn agus Ollscoil Uladh an foilseachán The Flight of the Earls/Imeacht na nIarlaí ag Institiúid Teicneolaíochta Leitir Ceanainn. Ba é Brian Friel, drámadóir, stiúrthóir amharclainne, údar agus Conallach na Bliana 2010 a sheol an leabhar iontach staire agus litríochta seo.

Rinne Comhairle Contae Dhún na nGall imeachtaí comórtha a thosú agus a chomhordú le linn 2007 agus 2008 chun cothrom 400 bliain Imeacht na nIarlaí a chomóradh. I gcomhar le hInstitiúid Teicneolaíochta Leitir Ceanainn agus Ollscoil Uladh, thugadar coimisiún don Dr Éamonn Ó Ciardha, David Finnegan agus Marie-Claire Peters eagarthóireacht a dhéanamh ar imleabhar páipéirí ó thrí mhórchomhdháil a tionóladh le linn na gcomórthaí seo.

Tiomsú críochnaitheach é The Flight of the Earls/Imeacht na nIarlaí ar 33 alt ó acadóirí tosaigh idirnáisiúnta a d’eascair as na comhdhálacha dhátheangacha idirnáisiúnta a tháinig le chéile mar chomóradh ar an ócáid lárnach seo i stair Uladh, na hÉireann, na Breataine agus na hEorpa. Tugann an t-imleabhar idirdhisciplíneach seo anailís chuimsitheach ar an Imeacht – comhthéacsanna, cúiseanna, cúrsa, torthaí agus comórthaí.

Is cuí go ndéanfaí an leabhar seo, a chlúdaíonn gach gné den ócáid chinniúnach seo i nuastair mhoch agus nualitríocht mhoch na hÉireann, a thiomnadh don Dr Brendan I Bradshaw agus don Ollamh Breandan Ó Buachalla (nach maireann); beirt scoláire iad seo a rinne saothar réadach maidir le nuastair mhoch, staireolaíocht agus léirmheas litríochta na hÉireann, saothar a bhí mar inspioráid ag na heagarthóirí agus ag cuid mhór de na scríobhneoirí sa leabhar seo.

Imleabhar gleoite cáscheangailte é The Flight of the Earls/Imeacht na nIarlaí – lándaite ar fad agus léirithe go flúirseach le mapaí agus íomhánna